LAOAG CITY – Nakasagana ti Commission on Elections iti aniaman nga agbalin a desision ti Supreme Court mainaig iti petision a mangkweskwestion iti pannakaitantan ti Barangay ken Sanguniang Kabataan Elections wenno BSKE.
Segun ken ni Comelec chairman George Garcia, iti oras a mangiparuk-at ti Supreme Court, nakasagana ti poll body iti aspeto ti budget ken operasion.
Nupay kasta, inbatadna a saanen a suruten ti Barangay ken Sanguniang Kabataan Elections iti dati nga iskedyul gapu iti panangipasardeng ti COMELEC ti amin nga election-related activities kalpasan ti baro a linteg.
Kabayatanna, umabot met iti P8 billion ti nagastos ti Comelec para iti panagsagsaganada iti 2026 BSKE, pakairamanan ditoy dagiti nagduduma a ramit, ballots ken manpower.
Mainaig iti daytoy, inbatad ni Garcia a mabalin pay laeng a mausar inton sumaruno nga eleksion dagiti na-prouse a ramit.
