LAOAG CITY – Immabot iti P193 a milyon ti pakabuklan a gated dagiti naidumduma a transaksion iti joint account da Vice President Sara Duterte ken ti amana a ni dati a Presidente Rodrigo Duterte iti uneg laeng ti maysa nga aldaw idi Marso 28, 2014, segun kadagiti rakurak ti Anti-Money Laundering Council (AMLC).
Iti panagtultuloy ti impeachment trial kontra iti bise presidente, sinaludsod ti prosecution panel ti witness a ni AMLC Executive Director Ronel Buenaventura mainaig iti ‘nature’ dagiti nagduduma nga account a naaramid idi Marso 28, 2014 nga addaan nagsasaruno a minilyon a transaksion.
Paset kadagiti transaksion ti P4.4 bilyon a financial movements a na-flag ti AMLC kadagiti rakurak a covered ken suspicious transactions.
Iti baet ti panagdengngeg, sinaludsod ni Senate Impeachment Court Presiding Officer Francis Escudero no naaramid dagiti transaksion iti agpada nga aldaw ken no ‘unique movements’ dagitoy.
Segun ken Buenventura, ti code iti covered transaction reports wenno CTRs ti AMLC ket ‘AI” a kayatna a saoen ket inter-account transfer.
Kinondenar met daytoy ti abogado ni Vice President Sara Duterte a ni Atty. Mark Vinluan iti panangipakitana ti pakabuklan a gated iti Senate livestream.
Kunana nga awan ti pakabuklan ti aktwal nga AMLC report ken mabalin a mangipaay ti saan nga umno a persepsion ti panag-aggregate kadagiti numero.
