LAOAG CITY – Nagpakdaar ti Bureau of Internal Revenue (BIR) ita nga aldaw ti Biernes, Oktubre 9, kontra iti peke a website nga agpampammarang nga opisial nga Online Registration and Update System (ORUS) ti ahensia.
Basar iti Bureau of Internal Revenue (BIR), tultuladen ti website ti orus.ph nga hitsura ti lehitimo a government portal.
Mabalin daytoy a mangipakita ti “suspicious pop-up windows” ken dumawat iti saan agagangay a pammalubos iti device, a posible a mangitunda ti peggad iti privacy ken cybersecurity, pakairamanan ditoy ti panagtakaw ti datos.
Binalakadan dagiti taxpayer nga saan a bisitaen ti nadakamat a website, mangikabil ti personal wenno impormasion nga adda pakainaiganna iti buwis, wenno mangipaay ti aniaman a pammalubos a kiddaw dagitoy.
Inlawlawag ti agensia a ti opisial nga ORUS platform ken ma-access laeng iti https://orus.bir.gov.ph/.
Ginutigotda pay ti publiko a siguradoen nga umno ti website address sakbay a mangipaay ti sensitibo nga impormasion iti online.
Malaksid iti daytoy, binalakadan ti ahensia iti publiko nga agbalin a naridam kadagiti online scam a tumultulad kadagiti platform ti gobierno.
Ti siasinnoman a makakita ti suspiscious link, pop-up wenno website nga agpampammarang a konektado iti Bureau of Internal Revenue wenno BIR ket masapul a makagun-od ti dokumentasion ken insigida nga i-report iti ahensia para iti imbestigasyon.
