LAOAG CITY – Nagtalinaed a saan pay nabigbig ti kinatao dagiti suspek ken iti namunganayan ti pammaltog iti paset iti Brgy. Buttong-Darayday Road.
Daytoy ti inbatad ti Philippine National Police – Laoag kabayatanna ti imbestigasionda iti nadakamat nga insidente.
Maipalagip a napasamak ti maysa nga shooting incident wenno pammaltog ti paset ti Barangay 50 Buttong, ditoy siudad ti Laoag, iti dalan nga agturong ti Barangay Darayday.
Nabigbig dagiti biktima a maysa a lalaki nga agtawen 18, saan a naasawaan, estudiante ken maysa a lalaki nga agtawen 31, naasawaan ken agpadada a residente ti Barangay 47 Bengcag ditou siudad.
Naamoan a dagiti biktima ket agpada a nakalugan ti electric bike wenno e-bike. Idinto nga adda nang-overtake kadakuada a maysa a motorsiklo ket pinalto-paltugan dagiti biktima ti agarop uppat aginggana lima a daras.
Mainaig iti daytoy, saan pay a nabigbig ti kalibre ti paltog a nausar.
Nagsagaba ti sugat ken danggis dagiti biktima nga insigida met a naitaray ti ospital kalpasan ti pannakagun-odda first aid ti maysa a panganan a nagkamanganda.
Basar kadagiti nakakita, nakasuot ti black longsleeves a bado ken yellow a t-shirt dagiti suspek.
Iti agdama agtultuloy ti panangiyuswat dagiti kameng ti kapulisan ti hot-pursuit and dragnet operation para iti posible a pannakatiliw dagiti suspek.
