LAOAG CITY – Nagbinnagkong ti dua nga agkabsat ditoy siudad ti Laoag no sadinno pakairamanan a nadangran iti inada basar ti Philippine National Police iti siudad ti Laoag.
Basar iti Philippine National Police – Laoag a dagiti biktima ket agtawen ti 42, lalaki, empleado ti Small Town Lottery, naasawaan ken ti maysa ket agtawen ti 74, babai, balu ken residente ditoy siudad ti Laoag. Kabayatan a ti suspek ket agtawen 39, naasawaan, maysa a food delivery rider ken residente ditoy siudad ti Laoag.
Basar iti imbestigasion ti Philippine National Police, adda ti presensia iti nasanger ti suspek ken napanna dinanon ken kinomprontarna ti inana iti kuarto. Idinto met a simmangpet ti kabsat ti suspek ken nangegna ti pammugkaw ti suspek iti inana no sadino insigida a naganawa ti kabsatna.
Agingga a naprobokar ti kabsat a nangala iti maysa a kitchen knife ken kasta met ti suspek a nakaiggem iti maysa a blue cutter a daytoy ti rugi a nagbinnagkong ti agkabsat.
Inanawa ti ina dagiti agkabsat no sadinno nairaman a nasugatan daytoy.
Insigida met a nagkiddaw ti tulong ti kaanakan dagiti dua nga agkabsat kadagiti tattao ken naitarayda nga insigida iti Governor Roque B. Ablan Sr. Memorial Hospital dagiti tallo nga indibidual para iti naan-anay a pannakatamingda.
Basar iti initial medical result, ti suspek ket nakapasar ti dua a bagkong iti boksitna, idinto a ti kabsatna ket nakapasar iti bagkong iti barukongna ken maysa sugat iti paset ti kannawan a matana ken ti inada ket nakapasar ti kannawan a sakana ken adda iti rumrumuar nga fracture iti kannawan nga imana.
Iti agdama, nagtalinaed dagiti nasao nga indibidual iti nasao nga ospital ket manamnama nga agsinnango dagitoy kalpasan nga malainganda ken maamoan no kalikagum dagiti agina a mangipila iti kaso iti suspek.
