LAOAG CITY – Umabot iti P510,000 ti naipaay a tulong pinansial para kadagiti 102 a benepisiario iti Mataginayon a Progreso Assistance Program ti gobierno probinsyal babaen iti Micro Small and Medium Enterprise Office.
Inpakaammo ni Dr. Elma Gabriel, mangidadaulo ti Micro Small and Medium Enterprise Office a dimmalan dagitoy iti “Capacity Building on Business Continuity Planning” wenno BCP training a naisayangkat iti Atrium Area iti dakkel a mall ditoy siudad ti Laoag.
Inbatadna a masapul a dumalan nga umuna dagitoy iti nasao a panagsanay tapno mapapigsa ti ammoda iti panagnegosio pakairamanan ti kapasidad da a mangoperar iti negosio.
Inlawlawagna a naibunong ti P5,000 iti tunggal maysa kalpasan ti pannakipasetda ti nasao a training.
Kabayatanna, inpanamnama ni Governor Cecilia Araneta Marcos ti agtultuloy a suportana kadagiti Micro Small and Medium Enterprise gapu ta mamati a dakkel a tulong dagitoy tapno makalung-aw dagiti umili manipod iti kinarigat ti panagbiag.
Innayon na a kaadoan kadagiti benepisiario ket agtagikua iti sari-sari store ken panaderia.
Inrakurak ti gobernador a dagiti babassit a negosiante wenno Micro Small and Medium Enterprise ditoy probinsia ti kangrunaan a kabinnulig ti gobierno probinsial a mangpasayaat iti ekonomia ti Ilocos Norte.
