Nagkari ni Presidente Ferdinand R. Marcos Jr., a sungbatanna dagiti kinakurang ti nurse kadagiti pampubliko nga ospital ken ti alisto a pannakapunno dagiti bakante a posision.
Iti panagbitlana iti 2026 National Annual Convention ng Philippine Nurses Association, inbatadna a paigetan ti gobierno ti panag-hire ken panagsanay dagiti nurse tapno makissayan ti nadagsen a trabaho dagitoy.
Iti agdama, umaboten iti 50 a pasiente ti ay-aywanan ti maysa a nurse iti tunggal shift wenno duty-na.
Adayo daytoy iti pagalagadan ti Department of Health a maysa a nurse iti tunggal 12 a pasiente.
Pakairamanan ti nasao nga addang ti gobierno ti pannakitinnulong iti Department of Health (DOH), Commission on Higher Education (CHED) ken Technical Education and Skills Development Authority (TESDA) tapno manayonan ti bilang dagiti lisensyado a nurse.
Matulongan met dagiti nursing graduate a saan pay a nakapasa iti licensure examination iti babaen ti Clinical Care Associates Program.
