LAOAG CITY – Natay ti 153 nga indibidual gapu iti panagatake usar ti drone strike iti maysa a merkado publiko idiay Abyei, Africa, maysa a rehiyon a pagin-innagawan ti Sudan ken South Sudan.
Timmama ti drone iti maysa a gasolinaan a nangitunda ti dakkel nga uram.
Mainaig iti daytoy, pinabasol ni Yohanna Akol Ngor, ti caretaker information minister ti Abyei dagiti suldado ti Sudan nga adda iti likudan iti nasao a panagatake iti merkado publiko idiay Amiet a paset ti Abyei.
Basar met iti senior Sudanese military officer, dagiti natay nga indibidual ket dagiti miembro ti Rapid Support Forces ken dagiti adda pakainaigan na iti fuel smuggling.
Kabayatanna, inbatad dagiti otoridad a malaksid kadagiti natay, nairekord pay ti nasurok a 20 a sabsabali a nasugatan, no sadinno a sumagmamano kadakuada ti adda iti kritikal a kondision.
