LAOAG CITY – Inpasigurado ni Senate President pro-tempore Tito Sotto III a saanen a maulit inton 2027 national budget ti kapada nga indeklarar ti Korte Suprema nga unconstitutional kadagiti probision ti 2024, 2025 ken 2026 national budget.
Inbatad ni Sotto a saanda nga ipalubos nga adda dagiti maipagarup a ginaraw iti nailungalong a budget para iti sumaruno a tawen a maikanniwas iti ruling ti Korte Suprema.
Inlawlawagna a kas kapada iti nagbalin a nailian a pondo ita a tawen, agbalin a transparent ken naka-livestream manen ti budget deliberatios iti bicameral conference committee tapno urnos ti panangtalantan ken ammo dagiti tattao no sadinno ti pakaibusbusan ti kuarta ti gobierno.
Immunan nga inrakurak ni Finance Committee Chairman JV Ejercito a malaksid iti livestreaming ket ituloyda ti narugian iti 2026 kas ti panag-upload iti senate website dagiti budget documents a naaprobaran manipud iti Kamara de Representantes agingga iti bicameral conference committee tapno maadal ken mabantayan ti publiko.
Iti inyetnag a ruling ti Korte Suprema, indeklarar a panaglabsing iti Konstitusion ti 2024 ken 2025 national budget gapu ta pinadakkel ti alokasion iti unprogrammed appropriations idinto nga unconstitutional met ti special provisions ti 2026 national budget nga overly broad, awan ti prioritization standards ken sumagmamano a paset ket maibilang a lump sum.
