Adda ti posibilidad na a ma-revoke ti lisensya ti driver ti bus nga addaan ti rota a Laoag-Pagudpud a nagbaliktad kalpasan a napukawan ti preno kabayatan ti panagdaldalyasat na iti agsalog a paset ti kalsada iti Barangay Baruyen iti ili ti Bangui a nakasugatan ti nasurok a 20 a pasahero a kaadoan ket estudyante.
Daytoy ti inbatad ni Mr. Cocoy dela Rosa, District Officer iti Land Transportation Office ditoy ciudad ti Laoag.
Kuna na a maibasar iti video wenno dashcam manipod iti maysa a behikulo ket makita a nataray ti bus ken mabalin a naladawen idi nagpreno ti driver a nangitunda ti panagbaliktad na ken nakadungparan na ti kasabat na a pickup.
Nupay kasta, kuna na nga ipaima da paylaeng ti kaso iti Philippine National Police para iti naan-anay a pannakaimbestigar na, no sadinno a no mapaneknekan a gapu iti kinataray ti bus ti rason a napasamak ti disgrasya ket possible a mapatuludan ti show cause order ti driver a mabalin nga agtungpal ti pannaka-revoke ti lisensya na.
Innayon na a ti mangipaay ti show cause order ket possible nga iti Regional Office da wenno iti Central Office.
