LAOAG CITY – Paigetan ti Philippine Drug Enforcement Agency (PDEA) Region 1 ti panagmonitor kadagiti kabaybayan ken delivery parcels tapno maliklikan ti pannakausar kadagitoy a wagas iti panangiyeg ken panangilaklako kadagiti ilegal a droga.
Segun ken ni SAO IV Bismarck Bengwayan, Acting Public Information Officer ti PDEA Region 1, maysa kadagiti karit a sang-sangoen dagiti otoridad ket ti panangusar dagiti suspek kadagiti online transaction ken parcel delivery tapno maipatulod dagiti ilegal a droga a narigat a makita dagiti nangipatulod ken nangawat.
Kunana a makikoordinar ti PDEA kadagiti delivery site ken mangipatungpal iti K9 sweeping, nga aramaten dagiti aso a naisagana ken na-train a mangsagid ken angoten dagiti masussuspetsa a banag, pakairamanan dagiti posible nga adda ti drogana.
Gapu iti daytoy, inpaganetget ni Mr. Bengwayan iti panangituloy ti Coastal Community Drug Watch, a pakairamanan kadagiti mangngalap ken dagiti residente iti komunidad iti panangbantay kadagiti baybay ken panangipakaammo a dagus kadagiti otoridad no adda makitada a mapagduduaan a banag.
Innayon ni Bengwayan a napateg met ti panangisuro kadagiti miembro ti komunidad no kasano ti umiso a panangipakaammo kadagiti makita a saanda a sigurado a banag, ken ti panangsalimetmet iti ebidensiya tapno saan a madadael wenno ma-kompromiso ti pannakaisayangkat ti imbestigasion.
Kabayatanna, inbatad ni Mr. Bengwayan nga iti daytoy a wagas ket namnamaen ti PDEA a mapasayaat ti pannakikinammayet dagiti residente ken dagiti mangipatungpal iti linteg tapno maliklikan ti panangusar kadagiti baybay ken parcel delivery kas wagas iti panagiyeg wenno pannakaideliver ti ilegal a droga iti komunidad.
