LAOAG CITY – Inbatad ni SAO IV Bismarck Bengwayan, Acting Public Information Officer ti PDEA Region 1 ti naigiget a panangipatungpal ti Philippine Drug Enforcement Agency (PDEA) Region 1 ti panang-monitor kadagiti kabaybayan ken dagiti delivery parcel gapu kadagiti report a maaw-awat ti ahensia a maararamat dagitoy iti pagipuslit dagiti iligal a droga.
Kinunana ni Bengwayan a maysa kadagiti mangparparigat kadagiti otoridad ket ti panagaramat dagiti suspek ti online transaction ken ti parcel delivery tapno maipatulod dagiti iligal a droga a narigatda a maaktuaran.
Inpakaammona ti manamnama a pannakikoordinar ti ahensia kadagiti delivery site ken ti panagusarda ti K9 sweeping tapno alisto a maamoan dagiti mapagat-atapan a banag babaen ti napigsa a panagangot dagiti aso.
Mainaig iti daytoy, inpetteng ni Bengwayan ti agtultuloy a pannakaisayangkat ti Coastal Community Drug Watch, a pakipagpasetan dagiti mangngalap ken lokal a residente iti kabaybayan ken ti insigida a panangipakaammo dagiti mapagat-atapan kadagiti otoridad.
Kabayatanna, inpetteng ni Bengwayan a babaen kadagitoy a wagas ket makissayan ken maliklikan ti panagaramat dagiti online transactions ken parcel delivery para iti panangipatulod dagiti iligal a droga.
