Nagpalagip ni PLT/Col. Benedict Parado, ti Deputy Provincial Director for Administration ti Ilocos Norte Police Provincial Office (INPPO), kadagiti umili nga agturong kadagiti kamposanto inton undas a siguraduen da naka lock ti pagtaengan da.
Segun kenkuana, kasapulan nga ipangruna dagiti umili ti panangi-lock kadagiti ridaw no tumalaw da iti pagtaengan da gapu ta mabalin a gundawayan a serreken daytoy dagiti agtatakaw.
Impettengna ti naiget a panangliklik dagiti umili ti agibati ti nakasindi a kandela kadagiti pagtaengan da uray pay no nagbalin a paset daytoy ti tradision dagiti Ilocano no sadinno nga agsindi ti kandela iti uneg ti pagtaengan no kasta nga aldaw ti Undas.
Daytoy ket gapu ta mabalin a mangitunda wenno pagrugyanan ti uram ti kandela a mabaybay-an.
Mainaig iti daytoy, ikidkiddaw na dagiti umili nga agbalin a responsable iti aramiden da ti aldaw ti Undas.
Kabayatanna, impasiguradona nga addan to dagiti agpatrolya a kameng dagiti kapulisan a mangkita ti kasasaad dagiti pagtaengan wenno ti barbarangay kabayatan ti kaawan ken panagturong dagiti umili iti kamposanto.
