LAOAG CITY – Nakairekord ti 23.4% a kaibatugan ti P64.41 billion a panagbaba ti napastrekan ti Philippine Amusement Gaming Corporation (PAGCOR) iti umuna a siam a bolan.
Iti statement ti nasao nga ahensia, bimmaba ti gaming sector iti 37.23% manipud P44.03 billion idi naudi a tawen, no sadinno nakairekord manen ti panagbaba ti ahensia ti P27.63 billion iti daytoy a tawen.
Malaksid iti daytoy, bimmaba pay ti napastrekan ti ahensia iti licensed casino segment-na iti 3.22% a kaibatugan ti P23.10 billion.
Ti nasao a panagbaba ti mapaspastrekan ti nasao nga ahensia ket kalpasan ti panangiyetnag ti Korte Suprema iti Philippine Amusement Gaming Corporation (PAGCOR) ti panagiremit-na ti 5% a mapastrekanna iti Philippine Sports Commission (PSC).
Kabayatanna, iti baet ti panagbaba ti napastrekan ti ahensia, inpasigurado ni PAGCOR chairperson Alejandro Tengco ti agtultuloy panagaramid ti wagas ti PAGCOR tapno papigsaen pay operasionda.
