LAOAG CITY – Inbatad ni Mr Jeoffrey Martin Aplacador, presidente ti Pugad Lawin Ilocos Norte ti tinawen a panangisaysayangkatda ti trick or treat iti cancer patient unit iti Mariano Marcos Memorial Hospital and Medical Center iti siudad ti Batac.
Iti nasao nga programa ket nakaipalaonan dagiti gift giving, clown show ken mascot show.
Kinunana a daytoyen ti maika-15 a tawen iti panangisayangkatda iti kastoy nga aktibidad, no sadinno nga inpakammona a malaksid iti daytoy, addan to pay dagiti mapaspasangasangan nga aktibidad para kadagiti cancer patients nga ubbing kas koma iti Christmas program nga maangay intono Disiembre 11 a maisayngkat iti nasao met laeng nga ospital.
Napili ti grupo dagiti cancer patients wenno dagiti makunkuna a young warriors nga uray man pay adda dagiti sakit a marikriknada, kalikagum ti grupo a mangipaay ti ragsak kadakuada ken kasta metten iti panangandingayda kadagiti nagganak dagiti cancer patients.
Kabayatanna nagyaman met ni Dr. Jhoan T. Galano ti head Doctor iti Cancer Patient Unit iti nasao nga ospital iti kinaadda dagiti sponsors nga agtultuloy a mangipapaay ti tulong kadagiti nasao a pasiente.
Kinunana a no awan dagitoy a kinabunnuligda ket saanda a maiparaikna iti ragsak kadagiti cancer patients wenno young warriors a kanayon a makilablaban iti sakit.
