Inbatad ni Brgy. Chairman Manny Morales iti Barangay 1 ditoy siudad ti Laoag, a nakasaganan ti barangayda partikular iti panangipaay ti seguridad iti walo a kamposanto iti nadakamat a lugar.
Kas panagsagana, addan ti naisayangkat a panagtataripnong kadua dagiti barangay tanod ken dagiti kameng iti health department tapno madutokan dagiti puesto, dagiti akemda ken no mano nga aldaw ti panagbantayda.
Kalikagumda a mabantayan ti seguridad dagiti agturong amotorista ken pamilia kadagiti kamposanto.
Naamoan a mangrugi inton bigat, Nobiembre 1, tunggal barangay a nakapalawlaw kadagiti kamposanto ket adda bukodda a bantayan a kamposanto.
Ti Brgy. 1 ket bantayanna ti Catholic Cementery kabayatan a dagiti dadduma a kamposanto ket bantayan met ti sabali a barangay.
Mainaig iti daytoy, katinnulongda met nga agbantay dagiti kameng ti pulis ken manamnama ti roving ti kameng ti Philippine National Police, kadua dagiti tanod para iti pannakawanwan ti trapiko.
Kabayatanna, binalakadanda dagiti publiko a no mabalbalin ket saan nga agitugot ti lugan ken agpadissaagda tapno maliklikan ti maisyuan ti ticket, kitaen dagiti tugot a taraon, natadem a ramit, arak, ken dadduma pay.
