Inbatad ni P/Lt. Col. Jerome Wangkey, hepe ti Philippine National Police iti siudad ti Batac, a kas idi kalman, Nobiembre 1, nagtalinaed ti linak, urnos ken talna kadagiti kamposanto iti siudad ti Batac iti panagobserbar ti Undas agingga iti agdama.
Inpakaammona nga iti pito a kamposanto ti siudad ken tunggal kamposanto ket adda nai-deploy a 4 agingga 6 a personnel ti kapulisan. Kabayatan a katinnulong da pay nga agbantay dagiti barangay tanod, force multiplier volunteers, kameng ti Bureau of Fire Protection, City Health Office, City Disaster Risk Reduction and Management Office ken traffic enforcers.
Manamnama met ti ad-adu a tattao a bumisita kadagiti kamposanto iti siudad ita a Nobiembre 2 isu nga inpasigurado na met a nakasagana dagitoy ken dagiti kabinnulig nga ahensia a nagi-deploy dagiti personnel para iti security plan ken traffic plan.
Iti agdama, awan pay nakumpiskar a deadly weapon ken arak ngem adda laeng ti kumpay a nakita ngem nai-turn-over laeng iti command post ken maisubli to metlang inton rumwar iti kamposanto.
Mainaig iti daytoy,ipangpangrunada a kumpiskaren dagiti nakabote nga arak ngem no dagiti bassit nga arak a nakabaso wenno “tolerable” ket ipalubos para iti tradision ti panagselebrar ti Undas.
Kabayatanna, inpakaammona a nasaayaat met ti trapiko kadagiti kalsada gapu ta nasagaanan da dagitoy nga insidente babaen ti pannakaisayangkat ti maysa a conference nga indauloan Mayos Markee Chua no sadinno natratar ti traffic plan ken re-routing ken adda met dagiti personnel a naka-deploy.
