Natay ti maysa a babai kalpasan a nalmes iti kabaybayan a paset ti Barangay Gabut Norte iti ili ti Badoc.
Segun ken ni Police Capt. Christopher Pola, ti chief of police iti ili ti Badoc, ti biktima ket agtawen ti 37, taga Barangay Lubigan nasao nga ili ken maibilang kas “mentally challenged”.
Inbatad na nga iti imbestigasyon da, ket nakita ti maysa nga indibidual ti biktima nga agtatapaw iti kabaybayan isut gapuna nga inreport na a dagus iti Philippine National Police.
Kuna na nga iti panagresponde da kadwa da dagiti kameng ti Bureau of Fire Protection ket inpakat da paylaeng a dagus ti Cardiopulmonary Resuscitation (CPR) sakbay nga intaray da ti biktima iti Mariano Marcos Memorial Hospital and Medical Center iti ciudad ti Batac ngem naideklarar a pimmusayen.
Inpasingked ni Pola nga awan ti nakita da a foul play iti pannakatay ti nasao a biktima.
