Naglikudan ti Philippine National Police (PNP) ti panawagan nga agus-usar ti “shoot-to-kill” approach iti panangipatungpal ti warrant of arrest kontra ken ni Senador Ronald “Bato” Dela Rosa.
Segun ken ni PNP chief General Jose Melencio Nartatez Jr., responsibilidad da nga ipatungpal ti linteg ken saan nga agaramid ti mailabsing iti daytoy.
Inpetteng na a masapul a suroten ti amin nga operasion ti due process, human rights ken rule of law.
Daytoy ket kalpasan ti panagwaras ti peke a quote card iti social media a nakaipalaonan ti maipagarop a panagpanpanawagan ni Cagayan de Oro Rep. Lordan Suan ti “shoot-to-kill” kontra iti Senador, banag a naglikudan ti kongresista.
Nupay kasta, inbilin ni Nartatez kadagiti police unit nga ituloy ti intelligence gathering ken monitoring tapno maamoan ti lokasion ni Dela Rosa, a sumangsango iti warrant of arrest mainaig iti kaso a crimes against humanity iti International Criminal Court ken adda ti naikeddeng a P50 million a gunguna para iti siasinno man a makaipaay ti impormasion tapno al-alisto ti pannakaarestar ti Senador.
