Nagballaag ti Philippine Health Insurance Corp (PhilHealth) iti publiko, healthcare providers ken partner organizations kontra kadagiti scammers nga agpampammarang a ni acting president ken chief executive officer (CEO) Beverly Lorraine Ho nga ag-solicit ti kuarta, donasion ken sponsorship.
Inbatad ti PhilHealth a ni Ho ken dadduma pay nga opisial ken empleado ti ahensia ket saan nga otorisado nga ag-solicit ti pondo wenno agkiddaw ti personal bank transfers manipud iti publiko wenno ti partners-na.
Nagbalakad pay ti Philhealth iti publiko a mangisayangkat laeng ti legitimate transactions ken inquiries babaen ti regional ken local health insurance offices.
Ginutigot na pay ti siasinnoman a makagun-od ti ‘suspicious’ wenno kwestionable a message wenno tawag a saan a makikommunikar iti sender ken i-report ti insidente iti kaasitgan a Philhealth office, ti 24-hour Corporate Action Center wenno mobile hotlines ti ahensia.
Kabayatanna, nagpalagip pay ti ahensia a makagun-od laeng ti updates babaen ti opisial a webite ken social media page ti PhilHealth.
