LAOAG CITY – Posible a maawanan dagiti dua a Pilipino a nagbalin a naturalized American citizens ti US citizenhip gapu iti napaiget a kampanya ti administrasion ni Trump kontra iti immigration fraud.
Binigbig ti United States Department of Justice dagiti dua a da Arnel Dacumos Tabafunda, agtawen 47 ken ni Ramon Navarro, agtawen met ti 68, no sadinno agpadada a sumangsango iti agsina a denaturalization proceedings kadagiti pederal a korte idiay California.
Basar iti Justice Department, ni Tabafunda ket sumangsango iti pananakaibabawi ti citizenship-na gapu iti maipagarup a panangilemmengna ti sexual abuse offenses kontra iti maysa a menor de edad sakbay pay ti pannakaalana ti US citizenship-na idi tawen 2005.
Sumangsango met ni Navarro iti kaso gapu iti palso a pannakikasar tapno makaala ti immigration benefits kas ti US citizenship.
Kabayatanna, iti salinong ti US immigration and nationality Act, mabalain nga ibabawi ti naturalized citizenship ti maysa nga indibidual idiay Amerika no daytoy ket iligal a naala.
