LAOAG CITY – Nagpanawagan ni Mr. Sonny Africa, Executive Director ti Ibon Foundation iti gobierno ti pannakamyendar ti panangkita no kasano ti kinakurapay ti maysa a Pilipino.
Kinunana a dagiti ar-aramaten ti gobierno a panangkita iti kasasaad dagiti Pilipino ket arigna saan a nakapappati gaputa kabaliktranna daytoy ti umno a mapaspasran dagiti Pilipino.
Iti nagbalin a sukisok ti gobierno mainaig iti 96 pesos a pakakitaan no kasano ti kinabaknang wenno kinakurapay ti maysa nga indibidual, inpetteng ni Africa a malaksid iti nabayagen nga ususaren ti goberno ti nasao a pagibasbasaran ket saan pay nga umno ti nagbalin nga approach-da.
Para kenkuana, basar kadagiti agdama a presio dagiti magatang iti merkado, masapol ti maysa nga indibidual ti 200 a pisos iti tunggal aldaw tapnon agbiag a disente, no sadinno ti 96 pesos nga ibagbaga ti gobiernno ket awan pay daytoy ti guduana.
Segun kenkuana, malaksid iti makan, masapol ti maysa nga indibidual ti balay, danum, kuryente, plete, agas ken dadduma pay.
Gapu iti daytoy, kiniddawna iti gobierno ti umno a panangkita iti agpayso a kasasaad dagiti ordinario a Pilipino.
Kabayatanna, mensahena kadagiti mangmangged nga agtultuloy nga agtrabtrabaho tapno laeng masuposopan dagiti kasapulan ti pamiliana a saanda koma a panunoten nga isuda ket marigrigat gaputa ti umo a rason ti panagrigat dagiti Pilipino ket saan a gapu iti kinasadot no diketdi gaputa saan a datayo ti panpanunoten ti gobierno.
