Inakusaran ti France ti Islamic Revolutionary Guard Corps (IRGC) ti Iran nga adda iti likudan dagiti serye ti cyber-attack a nangpangato ti temperatura dagiti refrigerator ken freezer kadagiti supermarket iti intero a pagilian iti napalabas a bolan.
Segun ken ni French Foreign Minister Jean-Noël Barrot, ti nasao a panagatake ket maibilang kas awan ti kapada na iti kadakkel ken lebel ti agresyon kagiddan ti panagballaag na a patawan ti sanctions dagiti adda iti likudan ti insidente.
Inpetteng na a daytoy ti kaunaan a nalawa a cyber-attack a nakatutok iti panagsabotahe iti teritoryo da, isut gapuna a paawagan ti gobierno ti France ti ambassador ti Paris tapno idanun ti naiget a protesta da kontra iti nasao nga addang.
Maipalagip nga idi Oktubre 11, naala dagiti hacker ti kontrol iti software a mangreg-regulate iti temperatura dagiti cooling unit iti nasurok a 100 a Coopérative U supermarkets ken 180 a puwesto ti Intermarché ken Netto, no sadinno nga umabot iti 50°C ti kinabara ti sumagmamano a freezer overnight a nangitunda ti pannakadadael ti naruay a tonelada a frozen food.
Kabayatanna, narugyananen ti imbestigasyon dagiti prosecutor ti Paris kontra iti mangidadaulo ti offensive cyber unit ti Islamic Revolutionary Guard Corps a mabigbig kas Shahid Kaveh ken ti dua a representative, idinto a naglikudan ti dadduma nga Iranian media outlets dagiti alegasyon ken inawagan da nga awan ti pagibasaran.
