Nagsasaruno a saludsud ken ballaag manipod kadagiti na senator-judge ti sinango ti umuna a testigo ti depensa ni Vice President Sara Duterte kalpasan a kwinestyunaran da ti saannan a malagip a detalye dagiti nagbalin a biyahena idiay China.
Iti panagtultuloy ti impeachment trial idi kalman, Lunes, Nobyembre 9, sinaludsud ti House prosecution lawyer a ni Atty. Benjamin “Jay” Tolosa Jr. ni Davao City Assessor Engr. Jaime Adalin maipanggep ti maipagarop nga all-expenses-paid trip na iti China idi Nobyembre 2025.
Immunan nga inbatada ni Adalin a saanna pulosen a malagip no nakapan idiay China, a rason ti panangkwestyunar dagiti prosekusyon ti kredibilidad na kas testigo.
Iti panangibaga ni Adalin a saan a napateg ti saludsud, dagus a dinillaw ni Senate impeachment court Presiding Officer Francis “Chiz” Escudero.
Inlawlawag ni Escudero a napateg a maamoan no pudno a saan a malagip ni Adalin ti mismo a biyahe na wenno ti eksakto a petsa koma manlaeng.
Gapu iti daytoy, inbatad ti testigo a possible a petsa laeng ti saanna a malagip.
Nupay kasta, saan latta a nagbalin a nalawag ti sungbat na iti pannakasaludsud manen kenkuana no nakapanen idiay China iti panawen a dakdakamaten ti prosekusyon.
