LAOAG CITY – Kinomendaran ti Sangguniang Panlungsod iti siudad ti Batac ti vlogger ken content creator a ni John Lennon Abad Simisim wenno amammo kas KASHIN gapu iti paangitampok na ti Empanada ken kas panagbalin na a nalatak a Bataqueño.
Ti komendasion ket indauloan ni temporary presiding officer Hon. Kitchel G. Pungtilan.
Mainaig iti daytoy, intampok ni Simisim ti empanda kadagiti nagduduma a social media platforms ket no sadinno a naitandudo ti Turismo iti siudad.
Gapu iti daytoy, naipakita ti napigsa a suporta kadagiti Micro Small and Medium Enterprises (MSMEs) ken panangpreserbar ti legasiya ti kultura iti siudad.
Napalaos met ti ragsak ni Simisim iti naawat na a pammadayaw. Kinunana nga ti pangitampok na iti empanada ket mangipasimudaag ti napalaos a panagayat na ken kina-proud na kas maysa a Bataqueño.
Ginutogot na dagiti agtutubo nga mabalinda nga aramiden wenno surotenna ti addang na no laket awan ti madalapos da a sabali a tao.
Innayonna a surotenda laeng dagiti arapaap da ken agtalinaed a napakumbaba.
