Inbasura ti Armed Forces of the Philippines (AFP) ti ispekulasyon a maipagarop nga adda ti impluwensya iti uneg ti military ni Senador Ronald “Bato” dela Rosa, a maysa a Philippine Military Academy (PMA) alumnus.
Ni Dela Rosa ket an-anupen dagiti otoridad kalpasan nga inparuk-at ti International Criminal Court (ICC) ti arrest warrant kontra kenkuana.
Inbatad ni Armed Forces of the Philippines spokesperson Colonel Francel Margareth Padilla, a respetaren ti military ti papel ti Philippine National Police (PNP) iti panangiyuswat ti law enforcement operations tapno matunton ken maarestar ni Dela Rosa.
Immunan nga inrakurak ni Interior and Local Government Secretary Jonvic Remulla a narigat a maarestar ni Dela Rosa gapu ta daytoy ket dati a PNP chief ken maysa a PMA alumnus.
Nupay kasta, nagkari ti PNP a ti personal a relasyon ken dati a posisyon ni dela Rosa ket saan a makaimpluwensya ti panangikarkarigatan da a mangarestar iti senador.
Ni dela Rosa ket addaan ti P50-milyon a patong iti ulo na para iti al-alisto a pannakaarestar na.
