Inbatad ni Sangguniang Bayan Member Eduard T. Mendoza, Chairperson ti Committee on Health iti ili ti Marcos, ti pannakaipaay ti libre a serbisio medikal kadagiti umili babaen kadagiti programa a mangpabileg iti salun-at ken pagimbagan dagiti kailian na.
Pakairamanan ditoy ket ti panangipaay ti sarrukod, laboratory tests, feeding program, haircut, ken eye check-up.
Malaksid iti daytot, naipaay pay ti 20 a wheelchair para kadagiti napili a benepisiario.
Segun ken Mendoza, agtultuloy pay dagiti kastoy a programa na, kas ti manamnama a sumaruno a panangipaay iti libre a serbisio medikal ita a bolan ti Nobiembre, a planona nga ipatungpal kadagiti Barangay Pacifico ken Tabukbok iti met laeng nadakamat nga ili.
Inbatadna na pay nga adda agdama a programa ti lokal a gobierno kas iti YAKAP, a maysa a programa a mangipaay iti serbisio iti salun-at.
Kabayatanna, nagkiddaw daytoy kadagiti kakailianna nga agrehistro da iti Rural Health Unit (RHU) tapno agbalin da a maysa kadagiti benepisiario ken mausar dagiti serbisio a maipaay babaen iti daytoy a programa.
Innayonan na pay nga agtultuloy ti panangipaay ti tulong ti lokal a gobierno kadagiti umili, nangruna kadagiti kasapulan ti serbisio ken suporta para iti salun-at.
