LAOAG CITY – Nangipatungpal ti Department of Justice (DOJ), babaen ti Office of Cybercrime (OOC), ti nasional a kampanya tapno matulongan dagiti Pilipino a maamoan ken maliklikan dagiti online scam.
Kagiddan daytoy ti pannakaiparuk-at ti datos manipud iti 2026 State of Scams in the Philippines report ti Global Anti-Scam Alliance (GASA) no sadinno nga 84 a porsiento kadagiti Pilipino nga adda iti umno nga edad ti makapaspasar ti pananglipot iti napalpalabas a tawen, nangatngato no idasig iti 77 a porsiento idi 2025.
Mainaig iti daytoy, mapatta-patta met a 15 a porsiento ti makapaspasar ti pannakalugi iti kuarta, a masansan nga adda pakainaiganna iti panagtakaw ti personal nga impormasion.
Kabayatanna, naipanagetget met ti kinapateg ti panagtitinnulong ti gobierno ken pribado a sektor gapu ta mabalin a mairaman iti scam dagiti telecommunications company, social media platform, financial institusions, ken dagiti kriminal manipud iti sabali a pagilian.
