Mangisayangkat ti lokal a gobierno iti Ciudad ti Batac iti aktibidad a GCash Cityzens Day, GCash Cityzen’s ID Profiling, PhilHealth YAKAP Rollout, ken libre a serbisio iti Civil Registry iti Imelda Cultural Center West Wing, mangrugi ita nga aldaw, Nobiembre 13 agingga intono bigat Nobyembre 14, 2026.
Babaen iti GCash Cityzens Day, mabalin a makaala dagiti umili iti National ID, agparehistro ken agpa-verify iti GCash account.
Adda met dagiti libre a bagas a maawat dagiti agparehistro para iti CITYzen’s ID.
Ti CITYzen’s ID ket maysa a digital identification card a mangipaay iti nalaklaka nga access dagiti residente kadagiti programa, serbisio ken tulong manipud iti City Government, a nakakonektar iti GCash tapno napardas ken nalaklaka ti panangawat kadagiti benepisio ken tulong pinansial.
Kabayatanna, ti PhilHealth YAKAP wenno Yaman ng Kalusugan Program ti Philippine Health Insurance Corporation ket mabalin a gundawayan dagiti miembro para kadagiti libre a serbisio iti salun-at, kas iti konsultasion, health check-up, assessment, napili a laboratory tests ken dagiti agas babaen kadagiti accredited YAKAP clinics.
Maipaay met ti libre a serbisio iti Civil Registry, agraman ti delayed registration of birth, registration of affidavit of legitimation, registration of supplemental report, ken tulong para iti out-of-town registration.
Kuna ni Mayor Mark Christian Chua a ti kangrunaan a gagem ti programa ket maiyasideg dagiti serbisio publiko tapno nalaklaka a magundawayan dagiti umili, nangruna dagiti kasapulan iti panagrehistro ken dokumento.
Innayun na a napateg dagitoy a programa tapno amin a Batakeño, nangruna dagiti awan pay ti kumpleto a dokumento na, ket saan a mabati iti panagprogreso ken panangala kadagiti karbengan ken serbisio a maikari a maawatda.
