Nangiparuk-at ti extradition warrants of arrest ken hold departure orders (HDO) ti Makati City Regional Trial Court (RTC) Branch 145 kontra kada Pastor Apollo Quiboloy, Teresita Dandan, ken Helen Panilag, kalpasan dagiti seryoso nga akusasyon manipod iti Estados Unidos a pakairamanan ti conspiracy to engage in sex trafficking by force, fraud, and coercion, sex trafficking of children, conspiracy to commit sex trafficking, ken bulk cash smuggling.
Namonganay dagiti\ akusasyon iti maysa nga indictment a naiparuk-at idi Nobyembre 2021 iti US District Court for the Central District of California, a nangitunda iti Federal Bureau of Investigation (FBI) a mangiparuk-at ti “wanted” poster para ken ni Quiboloy idi Enero 2022.
Iti baet dagitoy a kaso, agtultuloy ti panangilibak ni Quiboloy kadagiti alegasyon kenkuana ken inpetteng na a saan nga agtungpal iti hurisdiksyon ti Estados Unidos.
Kagiddan iti daytoy, inbatad ni Quiboloy ti panagamak na para iti seguridad ken karbengan na iti due process, ken ipetpetteng na a biktima ti naimpulitikaan a panangusig.
Malaksid iti extradition case, sumangsango pay ni Quiboloy iti sabali a kaso iti Pilipinas, karaman ti qualified human trafficking ken child abuse, nga inpila ti Department of Justice (DOJ) idi Marso 2024, a nagresulta iti panangiparuk-at kadagiti arrest warrant manipod kadagiti korte iti Davao ken Pasig.
Maibasar iti desisyon ti korte iti Makati, nakakita daytoy ti probable cause a ti tallo nga indibidual a nainaganan kadagiti arrest warrant ken iti reklamo iti Estados Unidos, ken dagiti kaso a maipabpabasol kadakuada ket sakupen ti extradition.
Kinumpirmaran ti Department of Justice (DOJ) ti pannakaiparuk-at dagiti warrant ken Hold Departure Order a sumursurut iti pormal a panagpila ti petisyon ti Estados Unidos para iti extradition dagiti tallo idi Nobyembre 9, 2023.
Ti panangiparuk-at ti extradition warrant ken hold departure order ket maysa a napateg nga addang iti proseso ti extradition, a mangipakpakita nga adda ti umdas a pagibasarn ti korte tapno itultuloy ti panagdengngeg iti extradition.
