Nakasaganan iti DUGONG BOMBO iti Bombo Radyo Philippines iti 25 a lugar iti pagilian.
Maisayangkat ita nga aldaw ti Sabado, Nobiembre 14, 2026 ti naisangsangayan a kadakkelan a single-day national voluntary blood donation drive a Dugong Bombo 2026 iti Bombo Radyo Philippines, kabinnulig ti Bombo Radyo Philippines Foundation, Inc. ken Philippine Red Cross, a sangsangkamaysa a maisayangkat iti 25 a kangrunaan a lugar iti intero a pagilian.
Addaan ti Dugong Bombo ti dakdakkel a pateg ita a tawen kas ti panangselebrar ti Bombo Radyo Philippines ti maika-60 a tawen iti media excellence ken ti sumurok 20 a tawen iti agtultuloy a public service ken volunteerism babaen ti programa a Dugong Bombo.
Iti sumurok 2 a dekada, nagserbi a pammaneknek ti Dugong Bombo iti awan kapadana a dedikasion iti Bombo Radyo Philippines iti panagserbi iti komunidad ken kadagiti aramid a makatao. Manipud iti inisiatibo tapno magutigot iti boluntario a panagidonar ti dara, nagbalin daytoy a nasional a tignay no sadinno agkaykaysa iti rinibu a Pilipino nga addaan ti maymaysa a gagem a mangsalaknib iti biag.
Iti intero a pagilian, sumagmamano nga ahensia ti gobierno, civic organization, religious groups, pagadalan, uniformed personnel, pribado a kompania ken individual donors ket umay manen nga addaan ti tured, asi ken kinaparabur. Mangipakpakita ti pannakipasetda ti natibker nga espiritu ti volunteerism ken sangsangkamaysa a responsibilidad a tumulong kadagiti agkasapulan.
Iti uneg ti sumurok 20 a tawen, nagserbi kas mapagtalkan a lifeline wenno sanggir ti DUGONG BOMBO kadagiti blood banks, hospitals ken emergency response units a nakatulong a mangipaay ti rinibu a blood units a nakasalaknib iti saan a mabilang a biag. Malaksid iti tinawen a bloodletting program, agtultuloy a manginspirar daytoy kadagiti komunidad a mangakseptar ti pateg ti boluntario a panagidonar ti dara ken pagbalinen nga agnanayon a kari ti panagserbi iti pada a tao.
Basar iti tema a “A Little Pain, A Life to Gain,” ipalagip ti inisiatibo ita a tawen iti tunggal Pilipino a nupay addaan ti sumagmamano a kanito ken bassit a saan a pannakakomportable ti panagidonar ti dara ket makasalaknib iti biag daytoy para kadagiti indibidual nga agkasapulan ti insigida a tulong.
Kabayatan ti sangsangkamaysa a maisayangkat ti Dugong Bombo 2026 iti 25 a kangrunaan a lugar iti intero a pagilian, pinasingkedan ti Bombo Radyo Philippines, Bombo Radyo Philippines Foundation, Inc. ken Philippine Red Cross ti karina iti public service, volunteerism, panangpapigsa iti komunidad ken panangbangon iti pagilian.
Kagiddan iti pannakaisayangkat ti nationwide bloodletting drive ita nga aldaw, indandanon ti Bombo Radyo Philippines ti naimpapusoan a panagyaman kadagiti amin nga stakeholder, sponsor, partner organization, volunteers ken blood donors gapu iti panagaramidda iti Dugong Bombo 2026 kas maysa a naisangsangayan nga aldaw ti asi, kinaparabur ken volunteerism.
Agyamankami unay ti panagaramidyo iti daytoy nga aldaw a mangpaneknek a panangipakita iti sangsangkamaysa a dedikasiontayo iti serbisio publiko.
Maisayangkat ita nga aldaw, Nobiembre 14, 2026 (Sabado) iti Laoag City Auditorium.
Basta Radyo…BOMBO!
