LAOAG CITY – Naarestar ti dua a menor de edad a lalaki nga agtawen ti 16 ken 18 gapu iti panagikot da ti maysa a saan a lisensyado a paltog iti Brgy. 31, Talingaan ditoy ciudad ti Laoag.
Basar iti Philippine National Police ditoy ciudad ti Laoag, nakaawat da ti report manipod iti maysa a concerned citizen iti oras ti 11:25 ti rabii mainaig ti kaadda ti maysa a lalaki nga awan ti badona a kumarkarit iti dalan ken adda ti paltog a nakasabukel iti short na.
Iti panagresponde dagiti kameng ti pulisya ket inbutaktak ti nakauyus a lalaki a ti paltog ket inpaima laeng kenkuana ti agtawen 16.
Gapu iti daytoy, nagturong a dagus dagiti otoridad kadwa da ti naarestar a lalaki iti balay ti agtawen ti 16 no sadinno a ditoy nga insuko a dagus ti maseknan ti maysa a calibre 22 revolver nga adda marka na nga smith and wesson cal 22 usa.
Awan met ti bala ti paltog a naikabil iti maysa a kahon.
Naamoan nga inarestar a dagus dagiti otoridad ti dua a menor de edad kalpasan nga awan ti naipakita da dokumento ti nasao a paltog.
Isagsaganan dagiti otoridad ti pannakaipila ti kaso a panaglabsing ti Republic Act 10591 wenno ti Comprehensive Firearms and Ammunition Regulation Act kontra kadagiti suspek.












