LAOAG CITY – Nagpanawagan ti Malacañang kadagiti demonstrador a suruten dagiti naikeddeng a pagannurutan iti panangisayangkat ti tignay-protesta, kalpasan ti komprontasyon ti pulisya ken dagiti raliyista iti Maynila idi Domingo, Nobyembre 15.

Segun ken ni Palace Press Officer Undersecretary Claire Castro, kasapulan a respetaren dagiti lugar a naideklarar  no-rally zone, aglalo iti pannakaisayangkat ti 49th ASEAN Summit iti pagilian.

Inpetteng ni Castro a saan a mabalin nga ibilang dagiti demontrador ti bukod da a bagi kas “patriotic” no ti bukod a pagannurutan ti pagilian ket saan da a matungpal.

Inkalintegan na met ti responsibilidad ti Philippine National Police (PNP) a pagtalinaeden ti kinaurnus ken  seguridad iti baet dagiti demonstrasyon.

Inpetteng ni Castro a saanna a kayat a sawen a saan a mabalin nga agtignay ti nailian a pulisya no adda ti karbengan nga agprotesta ti maysa nga indibidwal.

Inrakurak daytoy ni Castro kalpasan ti tensyon iti Liwasang Bonifacio iti Maynila, no sadinno a linapdan dagiti pulis dagiti demonstrador a nagplano nga agmartsa nga agturong iti Philippine International Convention Center (PICC) iti Pasay City.

Basar iti Manila Police District (MPD), adda dagiti inarestar da a demonstrador gapu iti maipagarop a panangriribok ken panangisayangkat da ti tignay protesta iti ruwar ti naikeddeng a freedom park.

Kinondenar met ti Kilusang Mayo Uno (KMU) at Alliance of Concerned Teachers (ACT) ti panagresponde ti pulisya, nga inladawan na a nadamsak.

Iti babaen ti linteg, bigbigbigen ti karbengan ti naurnus a  panagtitipon ken saan a kasapulan ti permit kadagiti  dadduma a pampubliko a lugar.

Karaman kadagiti kontraen dagiti protesters ket ti Pax Silica Initiative ken ti naikeddeng nga ibibisita ni US President Donald Trump ditoy Pilipinas intono bigat, Nobyembre 17.