Nasugatan ti 46 nga indibidual kalpasan a nagdinnungpar ti dua a pampasahero a tren iti kangrunaan nga estasyon ti tren idiay Prague, Czech Republic.
Karaman kadagiti nasugatan ket ti dua a drayber ti tren, ken awan ti nairekord a pimmusay.
Dagus a nagresponde dagiti rescue personnel ken emergency services tapno ibakwit dagiti pasahero ken mataming dagiti sinagaba da a sugat.
Immabot iti agarop dua nga oras ti operasyon sakbay ti pannakairuwar amin dagiti nakalugan iti dua a tren.
Basar iti report, adda ti 16 a gangannaet a karaman kadagiti naitaray iti ospital.
Gapu iti insidente ket temporaryo a naapektaran ti operasyon ti dadduma pay a tren nga agbibiyahe nga agturong ken rumuar iti lugar.
Iti agdama, agtultuloy ti imbestigasyon dagiti otoridad mainaig iti insidente.












