Nangiparuk-at ti abiso ti Department of Health (DOH) tapno palagipan dagiti masikog a babbai nga agannad kontra iti nakaro a kinabara ti panawen ken tikag nga epekto ti El Niño gapu iti mabalin nga itunda na iti problema iti panagsikog.

Inlawlawag ti ahensya a ti nakaro a pannakaisarang iti nakaro a pudot ket possible a mangpangato ti tiyansa ti nasapa a panaganak, pannakaregreg ti sikog ken dadduma pay a sensitibo a komplikasyon.

Mainaig iti daytoy, binalakadan dagiti eksperto dagiti masikog nga ugalien ti uminom ti ado ken nadalos a danom tapno saan a ma-dehydrate.

Nairekomendar pay kadakuada nga agtalinaed paylaeng iti nalinong ken napresko a lugar, ken no mabalin ket saan a direkta a sumarang iti init.

Innayon ti ahensya a napateg ti regular a panagpa-prenatal check-up iti kaasitgan nga health center tapno masubaybayan a naimbag ti salun-at ken ti sitwasyon ti maladaga.