Nagballigi dagiti otoridad a nangarestar iti tallo nga indibidual idinto a nakalibas ti maysa a kadwa da iti naisayangkat a search operation iti maysa a balay iti Barangay Madupayas iti ili ti Badoc.

Nabigbig dagiti naarestar nga agtawen ti 39, awanan ti asawa, pintor ken mannalon, taga Brgy, Catucdaan, Cabugao, Ilocos Sur, ngem agdama nga agnaed iti Brgy. Lubigan iti ili ti Badoc; agtawen ti 35, awanan ti asawa, residente ti Brgy. Catucdaan iti Cabugao, Ilocos Sur, ken agtawen ti 28, mannalon, naasawaan ken residente iti Brgy, Madupayas iti ili ti Badoc; idinto a ti nakalibas ket adda metlaeng iti umno a tawen ken residente ti Brgy. Madupaxas iti ili ti Badoc.

Naipatungpal ti operasyon babaen ti bileg ti Search Warrant a napetsaan ti Nobyembre 16, 2026 nga inparuk-at ni Hon. Felix Salvador, Presiding Judge ti 1st Judicial Region, Branch 17 ti RTC -Batac City, Ilocos Norte gapu iti panaglabsing ti Republic Act 10591 wenno Comprehensive Firearms and Ammunition Regulation Act.

Kabayatan ti operasyon ket nakakumpiskar dagiti otoridad ti maysa nga unit ti Riffle Carbine 30 M2 nga addaan ti magazine a naglaon ti 15 a bala; maysa nga armscor Rifle nga addaan ti magazine a naglaon ti 5 a bala para iti Cal .22; 14 a bala para iti Cal .30; 2 magazine para iti Cal .30; 1 rifle grenade nga addaan ti plastic case; 1 pistol revolver;1 pistol para iti Cal 45 nga addaan ti markings nga STI International Austin, Texas, USA ken adda pay ti magazine na a naglaon ti pito a bla ken maysa a live ammo chambered; maysa a magazine para iti Cal .45; 10 a bala para iti cal. 9mm; ken lima a bala para iti gauge 12.

Malaksid kadagitoy, nakumpiskar pay dagiti otoridad ti dua nga heat sealed plastic sachet a naglaon ti maipagarop a shabu nga agdagsen ti sumuruk-kumurang a 4.35 grams; maysa a digital weighing scale; 2 a glass tooter; maysa a cellphone ken maysa a broun pouch a naglaon ti philheath ID ken dua nga ATM Card.

Mainaig iti daytoy, inpasingked ti maysa kadagiti naarestar a napan da laeng iti lugar tapno ag-spray ti lasona ngem nakigtot da laengen idi nagpabigbig dagiti otoridad tapno mangiyuswat ti operasyon.

Inpetteng ti maseknan a saanda a bagi dagiti nakumpiskar nga ebidensya kontra kadakuada.

Kabayatanna, inbatad met ni Barangay Chairman Ruben Belasco iti Brgy. Madupayas iti ili ti Badoc a dua laeng kadagiti uppat a subject ti operasyon ti am-ammo na, a ti maysa a natiliw ken ti nakalibas.

Kuna na a ti maysa kadagiti natiliw nga am-ammo na ket nasayaat met a tao ngem inadmitir na nga adda dagiti sayangguseng a mangmangngegan na iti kallabes maipapan kenkuana ngem saannan nga indetalye pay idinto a ti nakalibas ket ibilangna met a nasingpet.

Iti agdama, nagtalinaed dagiti tallo a subject ti operasyo iti Philippine National Police iti ili ti Badoc idinto a ti nakalibas ket agtultuloy a birbiruken dagiti otoridad.