Nauram ti maysa a temporary shelter kalpasan ti napasamak a grass fire iti Barangay 32-B La Paz West, ditoy siudad ti Laoag.
Nabigbig ti agtagikua ti nadakamat a temporary shelter a ni Mr. Prudencio Paulino, agtawen ti 66, naasawaan ken residente iti nasao a barangay.
Segun ken ni Fire Senior Inspector Edison Reyes, Acting City Fire Marshal ti Bureau of Fire Protection (BFP) Laoag, napasamak ti grass fire gapu kadagiti napuoran a basura iti lugar.
Nupay kasta, saan da a nabigbig no siasinno ti nagpuor kadagiti basura.
Naamoan nga alisto a nagwaras ti uram agingga a dimmanon iti temporary shelter ni Paulino, a nangitunda iti pannakauram dagiti sumagmamano nga alikamen da kas kadagiti pagturogan da, bado ken dadduma pay.
Kabayatanna, agtultuloy pay laeng ti imbestigasion dagiti otoridad mainaig iti insidente ken saan pay a masinunuo ti pakabuklan a gatad dagiti nauram.












