LAOAG CITY – Manamnama a mapalawa ti sakupen iti voucher program ti gobierno iti pagilian babaen ti baro a linteg a pinirmaan ni Presidente Ferdinand Marcos Jr.
Iti babaen ti pammilin ti Republic Act No. 12327 wenno Basic Education Voucher Assistance Act, ti mismo Department of Education ti mangikeddeng ti gatad ti voucher basar iti kabaelan ti maysa a pamilia.
Mainaig iti daytoy, nangatngato ti posible a maawat dagiti estudiante manipud iti poor household wenno dagiti maibilang kas marigrigat a pamilia.
Sakupen pay ti programa dagiti estudiante manipud middle-income households.
Ti voucher program ket maysa nga assistance program para kadagiti kwalipikado nga estudiante a mangipaay ti gundaway para iti panagserrek da iti pribado a pagadalan tapno maipaayan ti naan-anay a pagpilyan dagiti estudiante.
Pakairaman ti maiprioridad nga estudiante ket manipud ka dagiti congested public school ken dagiti agnanaed kadagiti lugar nga adayo iti public school.
Karaman pay ditoy dagiti estudiante nga awan ti umdas a pagpilian a subjects wenno electives iti senior high school, ken kasapulan nga agturong wenno agadal iti pribado a pagadalan.
Ikeddeng pay ti linteg ti pannakaipatungpal ti Bureau of Private Education.
Kabayatanna, ti Bureau of Private Education ti mang-supervise ti kalidad ti edukasion ken iti regulasion dagiti pribado a pagadalan a karaman iti voucher program.












