LAOAG CITY – Inbatad ni Ms. Lovely Joy Garcia, Counseling Professional ti Speak Up, I’m Here Mental Health Hotline and Center iti Ilocos Norte Youth Development Office (INYDO), ti kinapateg ti pangipeksa iti marikrikna ti maysa a tao, nangruna no adda dagiti problema wenno emosIon a narigat a maipakita iti sabali a tao.

Segun ken ni Garcia, napateg nga adda sabali a tao a pagturongan iti maysa nga indibidual kas emotional support para iti pagimbagaan iti bagbagi.

No dagitoy nga emosion ket kanayon a maur-urnong ket mabalin a mangpataud iti kellaat a a panag-breakdown, pannakarikna iti bannog, wenno panagliday iti maysa nga indibidual uray pay awan ti nalawag a rason na.

Inlawlawagna a no agtultuloy a saan nga maipeksa ken bukbukudan ti maysa a tao dagiti problema ket mabalin a marigatan daytoy a maipaayan ti umno a tulong wenno intervention gapu ta uray ti mismo a tao a makapaspasar ti mental health problem ket saanen a nalawag kenkuana no ania ti namunganayan dagiti marikrikna.

Gapu iti daytoy, inpaganetget ni Garcia ti kinapateg ti panag-open up kadagiti mapagtalkan a tao, wenno panagpatulong kadagiti umiso a mental health professionals.