LAOAG CITY – Naarestren dagiti otoridad ti Mexico ti maibilang kas drug lord a ni Fausto Isidro “Chapo Isidro” Meza Flores.

Karaman ni Meza Flores iti Top 10 most wanted list ti Federal Bureau of Investigation.

Indauloan ti Mexican Special Forces ti panangarestar ken ni Meza Flores idiay Guasave, Sinaloa.

Addaan daytoy ti kaso nga organized crime, no sadinno maipagarup nga isuna pay ti adda iti likudan ti panagangkat dagiti fentanyl, cocaine, heroin ken dagiti sumagamano nga iligal a droga.

Malaksid iti daytoy, ni Flores pay ti lider ti Meza Flores Organization wenno adadda nga amammo a Guasave Cartel.

Ti nasao a grupo ket nagbalin nga aktibo iti panangiwaras ti iligal a droga sipud idi tawen 1990.

Babaen iti tulong ti US intelligence, naduktalanda ti paglemlemmengan ni Meza Flores, no sadinno kaduana a naarestar ti maysa a taona ket insigida a naikabil dagitoy iti Mexico City.

Kabayatanna, tawen 2025 idi naikabil daytoy iti listaan ti FBI kas most-wanted gapu kadagiti krimen a nakainaiganna kas ti kidnapping, extortion ken torture.