LAOAG CITY – Inarestar dagiti otoridad dagiti tallo a Vietnamese nationals gapu iti panangiwayatda ti medical practice nga awan ti pammalubosna iti Brgy. Merville, Parañaque City.
Iti inwayat nga entrapment operation ti Philippine National Police – Criminial Investigation and Detection Group (PNP-CIDG), naarestar dagiti nasao nga indibidual a nabigbig a da ‘Dr. Wang,’ agtawen ti 31, ‘Dr. Cong,’ agtawen ti 31 ken ni Dr. Fing,’ agtawen ti 29 kalpasan ti panagpammarang ti maysa a kameng ti PNP-CIDG kas maysa a pasiente.
Basar kadagiti otoridad, nabayagen nga adda iti police surveillance dagiti tallo a Vietnamese nationals kalpasan a nagreklamo ti maysa a concerned citizen gapu iti maipagarup a panangiwayatda dagiti operasion nga awan ti aniaman a lisensiada. Mainaig iti daytoy, nakibinnulig pay dagiti otoridad iti Professional Regulation Commission, no sadinno naduktalan nga awan ti board wenno commission resolution dagiti tallo a Vietnamese nationals a mangpalpalubos kadakuada a mangiwayat dagiti proseso a pang-medikal ditoy pagilian.







