LAOAG CITY – Manamnama ti panangi-deploy ti Philippine National Police (PNP) ti sumurok 6,000 a pulis iti Metro Manila para iti panangipasigurado ti seguridad para iti dua nga aldaw a transport strike a mangrugi intono bigat, Nobiembre 23 agingga 24.

Kas paset ti panagsagsaganana, mangisayangkat ti National Capital Region Police Office (NCRPO) ti Libreng Sakay usar ti police buses, trucks ken vans iti Baclaran, Paco ken Nagtahan iti Manila, Caruncho Avenue iti Pasig City ken South Caloocan.

Segun ken ni Philippine National Police Chief General Jose Melencio Nartatez Jr., gagemda a matulungan dagiti commuter a makabiahe kabayatan ti panangrespetar ti karbengan dagiti transport worker a mangiwayat ti natalged a tignay protesta.

Manamnama pay ti pannakikoordinar ti Philippine National Police (PNP) iti Metropolitan Manila Development Authority (MMDA) ken dagiti lokal a gobierno tapno mapagtalinaed ti natalged ken natalna a kalsada ken terminal kabayatan ti manamnama a tignay protesta.

Kabayatanna, nabilin dagiti otoridad ti panangiyunayda iti maximum tolerance ken propesionalismo iti pannakaisayangkat ti transport strike.