LAOAG CITY – Maysa a babai idiay Brazil ti nangikagumaan nga agbalin a pulis tapno matiliw ti nangpapatay iti amana.
Idi 1999, napatay ti ama ni Gislayne Silva de Deus a ni Givaldo iti maysa a bar kalpasan ti panagririri maipanggep iti utang nga agbalor iti 150 Brazilian reals.
Naglibas ti suspek a ni Raimundo Gomes ken naglemmeng daytoyen ken narigatanen dagiti otoridad a mangtiliw daytoy.
Iti tawenna a 18, simrek ni Gislayne iti law school ken nagbalin nga abugado kalpasan ti pito a tawen ngem ti nabayag a saan a pannakatiliw ken ni Gomes ket isu ti nangiduron kenkuana nga ibati pay laeng ti law career daytoy idi 2022 tapno agbalin a pulis.
Idi Hulio 2024, nagballigi a nakapasa isuna iti eksaminasion tapno agbalin nga imbestigador iti State Police ken dagus daytoy a nagkiddaw ti posision iti Homicide Division tapno tungpalen ti misyon daytoy a maarestar ti killer a ni Gomes.
Saan a napaay ni Gislayne ken ti naigetna a panangikagumaan, nabirokanna idi Setiembre 2024 ti killer a ni Gomes no sadinno a saanen a nakalibas pay ni Gomes idi arestaren isuna ni Gislayne.
Ti pannakaarestar ti suspek ti nangipaay ti hustisia iti pamilia ni Gislayne kalpasan ti 25 a tawen.
