LAOAG CITY – Inburay ni Miss Pebbles Dizon, maysa nga actress/model/businesswoman ditoy Ilocos Norte no kasanu a nadiskubre tapno agbalin nga artista.
Segun kenkuana, idi kangitingitan ti pandemya gapu iti covid-19 ket naistranded ditoy probinsya ni Direk Rey Coloma nga isu ti nagam-ammoan da.
Inbatad na nga inkari ti direktor nga agsubli ken saanna a ninamnama a tungpalen na daytoy gapu ta nakigtot laengen idi nagsubli ni Coloma.
Inlawlawag ni Pebbles a ti immuna a nangisabakan kenkuana ni Direk Coloma ket ti maysa nga Indie Film a “Traumatic”.
Maragsakan ni Pebbles a naipaayan na ti hustisya ti “Traumatic” rason a nagun-od na ti naan-anay a panagtalek kenkuana ti direktor.
Innayon na nga ubing paylaeng ket arapaap nan ti agbalin nga artista isut gapuna nga idi naikkan ti gundaway ket inbukbok na amin nga ammo na tapno saan a madismaya kenkuana dagiti tattao kangrunaan na ti direktor a nagtalek ken nangipaay kenkuana ti oportunidad.
Ni Pebbles ket nakagun-od ti pammadayaw kas ASEAN Youth Organization Philippines’ Outstanding Film Executive and Actress for the Year 2023.
