LAOAG CITY – Agkukurang ti suplay ken ngimmato ti presyo dagiti paputok a mailaklako iti babaen ti Gilbert Bridge ditoy ciudad ti Laoag.
Daytoy ti inbatad ni Mrs. Daisy Malano Agcaioli, maysa kadagiti aglaklako ti paputok ditoy ciudad ti Laoag.
Segun kenni Agcaioli, mangrugi iti 100 agpangato ti nagngatoan ti presyo dagiti babassit a paputok idinto a dagiti dadakkel nga items ket umabot iti 500 agingga iti sangaribo ti ngimminaan dagiti lako.
Inbatad na nga adda man ti suplay ket dakkel ti nagngatoan ti presyo na isut gapo na a saan da a kabaelan nga ilako ken mabalin a saan a gatangen dagiti tattao.
Inpalgak na nga iti dua a dekadan nga aglaklako ti paputok ket marikna ti karigat ti panaglako ita a tawen.
Kunana nga iti dua nga aldaw sakbay ti panangsarabo ti baro a tawen ket manmano pay laeng ti mapan aggatang.
Naamoan nga agingga da laengen iti Disyembre 31 ti rabii ti panaglako ken kunana nga ikarigatan na amin nga ilako uray sangkabassit laeng ti mapastrek na.
