LAOAG CITY – Bwineltaan ni Senador Panfilo “Ping” Lacson ni Senate President Alan Peter Cayetano mainaig iti isyu ti panagbalbaliw ti Senate rules.
Iti maysa nga statement, inpetteng ni Lacson nga awan ti dakes iti panagdedebate kadagiti mailunglungalong a panagbalbaliw.
Inpetteng na a ti dakes ket ti panangiwalin ti bukod a pagalagadan ken ti parliamentary procedures ti kangatoan a pagpandayan linteg iti kongreso iti babaen ti pananglapped kadagiti debate tapno laeng mapaalisto ti panangadaptar iti mosyon a nairefer iti Committee on Rules.
Daytoy ti nagbalin a sungbat ni Lacson kalpasan a sinaludsud ni Cayetano iti Facebook livestream na no dakes a pagsaritaan ti panagbalbaliw iti pagannurutan ti senado.
Inlawlawag met ti Senate President a saan pay a napagbobotosan ti mismo a panangamendar iti Senate rules a mangipalubos ti teleconferencing wenno online voting.
Innayon na a ti nagbobotosan da iti napalabas a sesyon ket ti maipanggep laeng iti mosyon no rumbeng a trataren iti plenaryo ti nasao a lungalong.
Iti sabali nga interview, inpetteng ni Lacson a nupay mabalin nga amendaran dagiti pagannurutan, masapol a suruten ti umiso a proseso.
Kwinestyunaran na ti arigna kalikagom ti mayorya a balbaliwan ti rules iti babaen ti “fastbreak-style.”
Segun ken ni Lacson, maikontra daytoyo iti sistema ti senado gapu ta iti babaen ti Section 24 ti Senate Rules, dagiti komite ti addaan ti mandato a mangtratar, agdesisyon ken mangipasa iti report maipanggep kadagiti isyu a naidatag kadakuada.
