LAOAG CITY – Kinumpirmaran ni Police Major Arnel Tabaog, ti chief of police ti PNP-Banna a naipilaan ti kaso a murder kontra iti suspek iti pammaltog a nakatayan ni Flordeliza Salvador iti Barangay Hilario iti nasao nga ili.
Binigbig ni Tabaog ti suspek a ni Juvinal Armida, mismo a kayong ti biktima ken taga ili ti Nueva Era.
Segun kenni Tabaog, ti nagbasaran da na nangipila ti kaso a murrder ket dagiti palawag dagiti testigo.
Inbatad na nga iti imbestigasyon da ket mapapati a nabayagen a riri ti suspek ken biktima ti motibo ti nasao a pammaltog.
Saan met a maibaga ni Tabaog no adda pay laeng idiay Nueva Era ti nasao a suspek ken ur-urayen da laeng nga adda ti maiparuk-at a warrant of arrest kontra iti daytoy.
Maipalagip nga idi Hunyo 9 ti rabii ket napaltogan ti biktima ken maipagarop nga adda ti nakita ti anak na a menor de edad nga agsipsipot, saan unay nga adayo manipud iti nagtakderan ti biktima.
