LAOAG CITY – Inpasigurado ni Brgy. Captain Joselito Aquino ti Brgy. Calambeg iti ili ti Piddig nga adda ti nakasagana a lugar a temporario a pagtarusan dagiti posible nga agbakwit a kabarangayan na.
Daytoy ket kalpasan nga adda dagiti residente ti nasao a Barangay partikular iti Sitio Lusong a maam-amak iti agdama a situasion a mapaspasaran da gapu iti kumarkaro a layos.
Nupay kasta, inlawlawag na a saan met pay a dimmanon ti layos kadagiti pagtaengan iti laksid a 20 a metro laeng ti kaadayo manipod iti karayan.
Kunana a basar iti panagmonitor da ket awan met pay dagiti naammoan da nga adda dagiti naiyanod ken nalmes a dingwen a taraken dagiti kabarangayan na ngem idi tawen 2019 ket inpalgakna a narway a dingwen ti naiyanod ken nalmes gapu iti nakarkaro pay a layos iti Barangay-da.
Inbatad na nga umabot iti 40 a household ti manamnama a maibakwit no bilang agtultuloy ti panagngato ti lebel ti danum ngem agpapan ita a gundaway ket awan met pay ti boluntario nga agibakwit.
Innayon na a napintas ken nasayaat met pay laeng dagiti kalsada iti Barangay-da gapu ta awan met pay dagiti makaabbeng iti laksid nga adda ti maysa a kawayanen ti natuwang ken napasamak a panagreggaay ti batbato iti Sitio Bacling ken Sitio Juan gapu iti panagtudtudona ngem dagus met laeng dagitoy a naikkat babaen kadagiti otoridad.
