LAOAG CITY – Inbaatad ni Agriculture Secretary Francisco Tiu Laurel Jr. a nganganin ti pannakausar ti African Swine Fever vaccine ditoy pagilian.
Segun ken ni Laurel, namnamaenna ti pannakaaprobar para iti commercial trial manipud iti Food and Drug Administration (FDA) iti uneg ti dua a lawas, a sarunuen ti commercial distribution.
Impaganetgetna nga epektibo ti nadakamat a bakuna manipud iti pagilian a Vietnam.
Immuna nga inpakaammo ni President Ferdinand ”Bongbong” Marcos Jr. a maiwaras dagiti bakuna para iti African Swine Fever ditoy pagilian ita a bulan ti Hulio.
Inbatad ni Department of Agriculture Undersecretary Roger Navarro a kabayatan ti state visit ni Marcos idiay Vietnam idi napan nga Enero, nakisarita dagiti opisyales ti Department of Agriculture kadagiti counterparts-da maipapan iti availability dagiti bakuna.
Mainaig iti daytoy, idi tawen 2023, nangilako ti pagilian a Vietnam iti dua a million a vaccine doses kontra iti African swine fever ditoy pagilian Philippines kalpasan a naaprobaran ti domestic use iti world’s first commercial vaccines kontra iti African Swine Fever.
