LAOAG CITY – Inpakaammo ni Mr. Marcell Tabije, mangidadaulo ti Provincial Disaster Risk Reduction and Management Office a dumanon iti sumurok 1,200 a residente ti nagibakwit kadagiti nagduduma nga evacuation center ditoy probinsia gapu iti iduduprak ti Bagyo Kristine.
Segun kenkuana, dagiti kangrunaan a nagibakwit ket manipud iti ili ti Adams, Bacarra, Bangui, Banna, Burgos, Currimao, Pagudpud, Pasuquin, Pinili, San Nicolas, Sarrat, Solsona, Vintar, iti siudad ti Batac ken ditoy siudad ti Laoag.
Inbatadna a kadagupan iti nasao a bilang ket addan dagiti residente ti nagsublin ken nakaawiden kadagiti bukudda a pagtaengan kalpasan a simmayaaten ti kasasaad ti panawen.
Inlawlawagna nga adda dagiti sumagmamano a nadadael iti benneg ti agrikultura ken imprastraktura ngem manarimaan pay laeng ti panang-consolidate-da kadagiti datos manipud kadagiti maseknan a lokal a gobierno.
